يوجد في 3 أماكن فقط.. حكاية “ساندوتش البسبوسة” الذي تحدى غلاء الأسعار

“تخيل إنك في قلب زحمة الشارع المصري وبتدور على لقمة حلوة تشبعك ومش هتدفع غير 5 جنيه بس؟”، هكذا بدأ صاحب “أرخص ساندوتش في مصر” حديثه وهو يجهز رغيفاً تلو الآخر لزبائنه المنتظرين.

ويكمل القصة قائلاً: “الساندوتش عندي بـ 5 جنيه بس، وأنا بعتبره أرخص ساندوتش ممكن تلاقيه، خصوصاً إن رغيف الفينو لوحده دلوقت بقى بجنيه. السر اللي خلاني أقدر أحافظ على السعر ده وأخلي الموضوع بسيط هو إني بعمل البسبوسة في البيت؛ والدتي هي اللي بتصنعها بإيديها يومياً من الساعة 3 العصر لحد نص الليل أو الساعة واحدة، وده بيخلي تكلفتها أقل وجودتها أعلى بكتير”.

وعن إقبال الناس وندرة هذا الصنف في السوق، يقول: “الناس في الأول بيشدها الكلام المكتوب على اليافطة، بيقروا ويستغربوا ويدخلوا يسألوا، وبمجرد ما الواحد بيدوق أول رغيف، بيطلب التاني والتالت فوراً. الساندوتش بتاعي مسطر وحلو، وزبايني من كل فئة؛ الطلبة، الشباب، سواقين التوكتوك والميكروباص، وحتى الأهالي في المنطقة”.

ويختتم صاحب المشروع حديثه بفخر عن تميزه: “إحنا قليلين جداً اللي بنعمل الساندوتش ده في مصر، هما 3 أماكن بس؛ واحد في المهندسين، وواحد في وسط البلد، وأنا هنا عند كوبري المظلات. والرزق في الأول والآخر بتاع ربنا، الشغل شغال ومستمر سواء في الصيف أو في الشتاء، لأننا بنقدم حاجة سعرها منافس وطعمها بيتي وأصيل”.